Gjiganti anglez, Liverpool sot ka nënshkruar zyrtarisht kontratën me Adidas, e cila do të prodhojë fanellat e klubit nga sezoni i ardhshëm.

Liverpool aktualisht është lider në kampionat dhe vetëm një mrekulli mund t’i pengojë ata të fitojnë kampionatin anglez. Të gjitha këto po i bën me fanellat e Nike, por një ndryshim i madh po vjen këtë verë.

Prodhuesi gjerman i pajisjeve Adidas konfirmoi këtë mëngjes nënshkrimin e një marrëveshjeje rekord me Liverpool, duke e rikthyer markën në Anfield pas një pauze 13-vjeçare.

Liverpooli kishte veshur më parë fanellat e Adidas nga viti 1985 në 1996 dhe nga 2006 në 2012.

Kontrata mes Adidas dhe Liverpool është nënshkruar për pesë vjet dhe kap vlerën e më shumë se 70.9 milionë euro në vit.

Në deklaratë thuhet se kontrata me Adidas do të sjellë një rritje të konsiderueshme në shumën e parave, duke e bërë atë padyshim një rekord.

Ajo që është interesante është se Liverpool do të veshë dy prodhues të ndryshëm fanella gjatë verës.

Meqenëse kontrata me Nike skadon më 1 gusht, Liverpool do t’i nënshtrohet përgatitjeve dhe do të fillojë para-sezonin me fanellat e Nike, dhe më pas do të kalojë në Adidas para fillimit të ligës.